Skip to main content
FAQ

FAQ

Bo kier sa mas di e proyekto

Kon e proyekto aki ta wòrdu finansia?

E proyekto ta haña apoyo finansiero for di e organisashon Hulandes pa estudionan sientífiko (NWO). Pa mas informashon: [NWO]

Ken a tuma insiativa pa ku e proyekto?

E proyekto aki ta un inisiativa di investigadónan di Kòrsou. Uaki pa sera konosí ku e tim di investigadónan. E guia sientífiko lo ta na enkargo di Prof. Dr. Rob Alessie.

Ki ta e meta di e proyekto?

E meta di e proyekto SONORO ta pa kontribuí na e konosementu di SIDS (Small Island Developing States) i pa mehorá e kalidat di bida di e habitantenan di Kòrsou. 

Kiko lo por hasi ku e resultdonan?

Sientífikonan por usa e data kolekta pa kompará data riba asuntunan finansiero i di salú den diferente konteksto. Ademas, organisashonan lokal sin meta pa hasi ganashi (“non-profit”) i esunan responsabel pa polítika (beleid/policy) lo por desaroya strategianan preventivo i polítika a base di evidensia, usando data di e komunidat. Finalmente, e populashon lo gana konosimientu tokante su propio asuntunan finansiero i di salubridat, kual lo por wordu uza pa plania bo propio estilo di bida strategikamente. Tambe, dor di yuda e komunidat pa pensa huntu ku investigadónan i organisashonan lokal tokante desishonnan finansiero i sobre salú, hendenan lo ta stimula pa nan ta envolvi den resultadonan i e sosiedat. Skuchando e hendenan, poniendo atenshon na problemanan aktual lo fortalesé nan konfiansa den nan mesun kapasidatnan. E komunidat ku lo keda funda despues di e estudio lo por wòrdu manteni dor di organisashonnan lokal i wòrdu ekspandé pa otro SIDS (Small Island Developing States) den Karibe Hulandes.

Ki dia e proyekto aki lo kuminsá?

Na prinsipio di e aña 2018, SONORO, ku su tim di investigadónan Kurasoleño, lo inisiá un estudio di termino largu tokante di e bida riba Kòrsou. Nos lo kier invitá abo pa partisipá den e komunidat di SONORO i duna bo opinion. E meta ta pa huntu nos bini ku ideanan bon i adekuá pa e isla.

Ken lo wòrdu invitá pa partisipá den e komunidat di SONORO?

Nos lo invitá 500 habitante di Kòrsou, ku lo wòrdu selektá kasualmente, den e komunidat di SONORO. E habitantenan aki kolektivamente lo representá e opinion di e habitante nan di Kòrsou. 

Kon lo entrevistá miembronan di e komunidat SONORO?

Kada aña nos lo pidi e komunidat 4 biaha pa reflekshoná riba tópikonan manera salú i bienestar. Esaki lo wòrdu hasí online pa medio di un enkuesta ku ta dura 15 minüt. Bo por indiká tambe kua tópikonan abo ta konsiderá mas importante. Partisipashon lo ta interesante i edukashonal. Bo lo risibí informashon regularmente tokante di e resultadonan.

Kon lo maneha e privasidat di un miembro?

SONORO lo prosesá tur informashon risibí di e enkuesta di un forma anónimo. SONORO ta tene su mes estriktamente na e lei di sekeresia. Artíkulo 5, insiso 2 di e lei di statistik (Statistiekwet) ta obligá SONORO pa atendé tur informashon ku a kompilá estriktamente konfidensial. E mesun lei aki ta konta tambe pa e entrevistadónan.

Kon ami por partisipá?

Si bo keda selektá pa partisipa den e proyekto, un enkuestadó di e proyekto SONORO lo bishitá abo na kas pronto. E lo informá bo tokante e proyekto  i puntra bo pa kompletá un enkuesta. 

Abo (of bo organisashon) kier puntra e komunidat di SONORO su opinion

Mi por manda mi enkuesta pa e komunidat di SONORO?

Esaki pronto lo ta posibel. E komunidat di  SONORO ta un instrumento valioso  ku lo por yuda investigadónan lokal I internashonal  den kolektá data pa nan investigashonan na un manera efektivo. Pero tambe periodistanan i studiantenan di organisashonan sosial lo por optené informashon valioso for di e komunidat. Por fabor tuma kontakto ku nos pa mas informashon na info@sonoro.community.

Abo a wòrdu selektá pa ta un miembro di e komunidat

Kiko partisipashon ta ensera?

Kada aña nos lo pidi e komunidat 4 biaha pa reflekshoná riba tópikonan manera salú i bienestar. Esaki lo wòrdu hasí online pa medio di un enkuesta ku ta dura 15 minüt. Ku bo number di miembro ku nos lo dunabo i bo password bo por bishita e pagina di e enkuesta riba nos wèpsait. Riba e pagina aki bo lo por yena e enkuesta nan inmediatamente. Kada hende den bo kas ku ta partisipá lo haña un number di miembro.

Pakiko ami mester partisipá?

Pa haña un imagen representativo di Kòrsou, ta importante pa tur kas ku keda selektá, partisipá. Pasobra e ora so lo por konklui ki realmente ta e opinion di tur hende. E komunidat di SONORO ta konsistí di kas. Den e komunidat tin hòmber i mohé, hende yòn i di edat, famianan ku ta biba na Kòrsou pa basta tempu o resien, personanan ku entrada halto o abou, hende ku ta traha i ku no ta traha, famianan i esanan ku ta soltero.

Bo lo yuda sientífikonan den nan invetigashon i sigurá ku gobièrnu lo bin ku polítikanan (beleid/policy) a base di loke ta biba den e sosiedat. Pa tin un bon investigashon un miembro di e komunidat ta nifiká hopi o manera un investigado investigadó a ekspresá: "Kada miembro di e komunidat ku partisipá ta kontribuí i na e resultado final. Kada miembro di e komunidat ta sigurá ku e resultado di e invetsigashon ta bira untiki mas konfiabel."

Kon nan lo tuma kontakto ku ami pa partisipá den e investigashon?

Pronto un enkuestadó di e proyekto SONORO lo bishitá bo. Bo lo risibí un flyer ku lo bisa bo mas di kiko e komunidat i investigashon ta ensera. E un enkuestadó lo splika bo mas over di e komunidat di SONORO i lo hasi bo algun pregunta over bo situashon di bida aktualmente manera:

  • Trabou
  • Bo besindario
  • Aktividatnan den bo tempo liber pero tambe preguntanan over:
  • Salú
  • Situashon finansiero
  • Bo opinion over algun topikonan

Na e manera aki bo lo por haña un idea di ki preguntanan abo por spera komo un miembro di e komunidat. E enkuestadó lo puntra bo si bo kier djòin e komunidat di SONORO.

Ken ta na enkargo di e investigashon?

E proyekto aki ta un inisiativa di investigadónan di Kòrsou. Klik­ aki pa sera konosí ku e tim di investigadónan. E guia sientífiko lo ta na enkargo di Prof. Dr. Rob Alessie di Univèrsidat di Groningen. CentERdata lo manehá e komunidat di SONORO. CentERdata ta un fundashon pa investigashon i kolekshon di data, afiliá ku e Univèrsidat di Tilburg.

Kon bo lo haña mi adrès?

E kas nan ku a keda selektá pa bira miembro di e komunidat, a wòrdu selektá kasualmente. Bo adrès a wòrdu selektá pasobra abo, huntu ku bo kas, ta representá un parti importante di e Komunidat di Kòrsou.

Kuanto tempu e ta tuma pa partisipá?

E no ta kosta muchu tempu. Lo tin alrededor di 4 kuestionario pa aña di mei ora. E benefisio di kontesta e preguntanan online ta ku señor(a) mes por disidi ki ora ta hasi esaki. Señor(a) tin por lo menos un siman pa hasi esaki. Tambe ta posibel pa stop i sigi na un otro momentu. 

Mi no ta muchu bieu pa partisipá?

Pa haña un bon bista di tur hende na Kòrsou ta importante ku tur griemio di komunidat ta partisipa. Hende jong, hende di medio edat pero tambe hendenan di edat. Hendenan di edat ta representa un parti importante di Kòrsou!

Partisipashon no ta difisil. E kuestionarionan ta fasil pa yena i bo lo por wak esaki tambe. Tin hopi pregunta multipel chois: e orei tin ku solamente buska e kontesta ku ta pas mas miho. Bo no por duna un kontesta robes, pues no tin un kontesta korekto tampoko. Asta tampoko bo no sa nada over di e tema. Nos ta mas interesa den kon bo ta pensa, ku den kiko bo sa. Si bo pega, e administrador di e komunidat ta kla pa yuda via telefon o email.

Mi tin un limitashon, ta malu, o no por wak bon (mas)?

E ora ei si ta difisil pa bo mes yena e kuestionario. Kiko bo ta pensa si tin un hende ku ta yuda señor(a) yena e kuestionario via di telefon o personalmente na kas?

Awo si mi no tin kompiuter o internet o mi no por traha ku kompiuter o internet?

Pa haña un bon bista di tur hende na Kòrsou, ta importante pa e hendenan ku no por huza/ no tin kompiuter o internet tambe partisipá. Kiko bo ta pensa si tin un hende ku ta yuda señor(a) yena e kuestionario via di telefon o personalmente na kas?

Bo ke protega bo privasidad? I tin miedu ku e informashon lo wordu huza pa propaganda?

E komunidat di SONORO ta mantene su mes na regla nan establese den e akto pa protekeshon di Data Personal/ Landsverordening Bescherming Persoonsgegevens Curaçao. Ora ku bo kontestanan drenta, nan lo wòrdu separa di nomber i adrès. Bo nòmber i adrès lo no wòrdu warda huntu ku bo kontestánan. Nos nunka lo duna akseso na bo informashon administrativo (bo number, adrès, number di telefon I email) sin bo permiso. Pues, bo informashon lo no wòrdu usa pa reklamo, mensahenan indesea (spam), benta telefoniko of pa otro propósitonan komersial.

Kometè pa un tempu largu?

Ku komunidat di SONORO nos lo hasi investigashon durante 4 aña tokante di bida na Kòrsou. Pa esei nos ta spera ku bo lo partisipá pa un tempu mas largu. Partisipashon semper lo keda boluntario: si bo no gusta, por stop mesora i sin niun gastu.